Euskara ospeletik eguterara. Hizkuntza zapalkuntzaren memoria

2014/06/03
Euskara ospeletik eguterara. Hizkuntza zapalkuntzaren memoria
Ekainaren 6a arte egongo da erakusketa berezi hau. Euskarak jasandako zapalkuntzak erakusten ditu eta zeuk ere halakorik ezagutu izan baduzu kontatzeko aukera eskaintzen du horretarako jarri dituzten paperetan. Udalerri Euskaldunen Mankomunitateak (UEMA) antolatutako erakusketa da.

Uztarria.com-ek eginiko albistea:

"Euskara ospeletik eguterara. Hizkuntza zapalkuntzaren memoria erakusketa dago ikusgai Sanagustin Kulturgunean, ekainaren 6a bitartean. Erakusketa horrek biltzen ditu euskarak historian zehar pairatu dituen debekuak, zigorrak, errepresioa eta oztopoak. Historiaren kontakizuna osatzeko, herritarren testigantzak, legeak edota agintarien esanak bildu dituzte erakusketan.

Bestalde, antolatzaileek mahaia jarri dute herritarrek ekarpenak egin ditzaten. Norbere esperientzia edo istorioak idatz daitezke paper batzuetan, horrela, erakusketa osatzen joan dadin. Erakusketa amaitu ostean, ekainaren 11an, Dabid Anautek, Euskararen kate hautsiak. Hizkuntza zapalkuntzaren memoria liburuaren egileak, hitzaldia emango du, Sanagustin Kulturgunean".

Erantzuna gehitu