Jose Mari Bastidak Sanagustin osatuaren proiektua "geratu" nahi izan du, bi salaketa jarrita

Azpeitiko Kultur Mahaiak ostiral honetan (uztailaren 22an) irekiko du Sanagustin kulturgune osatua (ostalaritza zerbitzuarekin, besteak beste), baina irekiera arriskuan izan da, Jose Mari Bastidak obrei buruzko salaketa bat aurkeztu zuelako duela bi aste, Kultur Mahaiko Talde Eragileak Mahaiko kideei eta bazkideei herenegun gauean jakinarazi zienez. Ez da Bastidaren salaketa bakarra izan hori, beste bat ere aurkeztu duelako EAEko Auzitegi Nagusian, helegite bati segida emanez.

Kultur Mahaiko Talde Eragileak hark gaia judizializatzeko hartutako jokabidea txarretsi du: "Bastidak eskubidea du salaketak sartzeko, baina Azpeitiko kultur taldeen proiektu bati (honi) errespeturik ez dio erakutsi, eta errekonozimendurik ere ez taldeei". Bastidaren salaketa bat, aipatu bezala, obrei buruzkoa izan da. Apirilean eta maiatzean Sanagustineko proiektua atal teknikoan impasse egoera batean egon zen udaletxean, eta Udalak gaiari berriro heldu zion ekainaren hasieran. Kultur Mahaiaren asmoa ostalaritzadun Sanagustin uztail bukaera aldera irekitzea zen. Hori hala, eta obratarako azken-azkeneko baimena lortzeko, Udala tramitetan zen duela aste batzuetatik Gipuzkoako Foru Aldundian, eta bazeukan Aldundiaren balekoa baina sinadura falta zen (sinatzailea jai egunetan zelako). "Obratan segitzeko nahikoa izaten da hori, ohiko prozedura da udaletan-eta, han eta hemen kontrastatu dugunez, baina Bastidak salaketa jarri zuen, eta egun batzuez obra geratu egin behar izan zen". Udalak lortua du falta zen sinadura hori.

Bastidaren beste salaketa ostalaritzako 25 metroko distantziaren udal ordenantzari buruzkoa izan da, ez dela betetzen esanez. Udalak maiatzaren 5eko plenoan erabaki baten bidez erantzun zion hari, esanez Sanagustin udal eraikin bat dela eta "udal intereseko proiektua" dela (helburu kulturalak...). Hala ere, Bastidak EAEko Auzitegi Nagusira jo zuen.

Bastidarekin lehen bilera, maiatzean

Talde Eragileak Bastidaren lehen helegitearen berri izan zuenean, bi ordezkari maiatzaren 5ean harekin bildu ziren Loiolan, ordubetez. "Bastidaren azalpenak entzun ondoren, Sanagustin osatuaren informazioa eman zioten hari, Kultur Mahai barruan proiektuaz egindako prozesua azaldu zioten, Udalak 1998tik Sanagustin kulturgune izateko egindako lana aitortu, elkarrekin berriro egoteko eskatu... Bastidak zioen 'EAJko juntakoekin' egotea nahi zuela", dio Mahaiko Talde Eragileak.

Kultur Mahaiaren ahalegin hutsala harekin berriro egoteko

"Orduan Talde Eragilean diskrezioari eustea erabaki genuen, ez zabaltzea gaia, ea Bastidarekin hitz eginda eta gauzak azalduta arazoa konpontzen zen. Maiatzetik telefonoz dozena bat aldiz saiatu gara harekin hitz egiten, kalean ere bai elkar ikusita (azkena, uztailaren 5ean), baina Bastida beti ihesean bezala zen, eta hark beti esaten ziguna: egongo ginela, baina aurretik 'EAJko juntarekin hitz egin behar' zuela gaiaz. Hala, elkarrekin egon gabe, uztailaren 7an jakin genuen haren salaketa baten berri, uztailaren 11n bestearen berri".

Legedi argudioak "aitzakia" proiektuaren aurka judizialki jotzeko

Kultur Mahaiko Talde Eragileak dioenez, Bastidak Loiolako maiatzeko elkarrizketa hartan aitortu zien legedi argudioak "aitzakia" bezala erabiliko zituela Sanagustineko proiektu honen aurka judizialki jotzeko. "Bera egitasmo hori 'geratzera' zihoala esan zigun". "Kultur Mahaiko kide denok dakigu Sanagustin osatuaren prozesua nola joan den: iazko azaroan hasi ginen, pauso denak segitu dira, azalpen denak eman dira, dokumentazioa, ekarpenak jaso, Mahaiko bilerak, aktak, batzarrak, bozketak. Ondorioz, herriko kultur mugimenduaren bilguneak hartutako erabakia izan da. Horrez gain, Udalak bere prozedura bete du (plenoak, bozketak, deialdi publikoa, adjudikazioa...), eta teknikoki posible zen obra egitea (Bastidak ezetz zion gurekin izan zenean, eta guk demostratu genion baietz, posible zela. Hala izan da). Baina Bastidak kultur proiektu hau judizializatuz 'geratu' nahi izan du".

EAJren herri batzordeari deia

Kultur Mahaiko Talde Eragilearen ustez, eta Bastidak beti "EAJko junta" aipatu izan duela-eta, "gaia noraino iritsi den ikusita, EAJko herri batzordeak zerbait esan beharko luke".

---

EAJko Uri Buru Batzarraren mahaiaren erantzuna Kultur Mahaiko Talde Eragileari (2011-07-21)

Enekoitz Esnaola Kultur Mahaiko kidearen erantzuna EAJko Uri Buru Batzarraren mahaiari (2011-07-21)