Aste honetan monologoa eta kontzertuak

2014/03/18
Aste honetan monologoa eta kontzertuak
Joan den asteburuan barre egin badugu Tor magoarekin, aste honetarako ere badugu zita bat umorearekin. Joseba Usabiaga bakarrizketa saioak eskaintzen hasiko da eta 'Oroitza-penak' izenekoa aurkeztuko digu Azpeitiko Sanagustin kulturgunean. Ostiralean izango da hori, eta zapaturako Ezinean eta Zea Mays taldeen zuzenekoaz gozatzeko aukera izango dugu.

Joseba Usabiagak bere benetazko oroitzapenak kontatuko dizkigu, baina modu dibertigarrian. Hau da, "oroitzak" eta "penak" ondo bereiztuta. "Ingurukoez, bere buruaz, pasarte dibertigarri eta eroez hitz egiten duen antzezlana" dela dio.

30 urteko bizipenaren ondorioz sortutako gogoeta eta erreflexioak uztartuko ditu bere benetako afizio eta gertakizunekin. Hori guztia musika eta arropa erosoz lagunduta, "gertakizun hauek guztiak ahalik eta ondoen entonatzeko". Umorean ibiliko gara. Ostiralean, 23:00etan hasiko da. Sarrera, 5€tan dago.

Zea Mays + Ezinean

Bi talde, bi disko berri. Zea Maysek 'Da' diskoa aurkeztuko digu zapatuan. Azken urteetan Euskal Herriko talderik arrakastatsuenetakoa den talde honek lan berria dakarkigu, Zea Maysen "alderik dantzagarriena, alderik bareena, alderik stoner eta basatiena biltzen dituena. Zea Mays osoa, alegia".

Ezinean Azpeitiko taldea ere zorioneko da eta etzi kaleratuko du bere hirugarren lana, Berriz izenekoa. Jaio berritan ezagutuko dugu beraz, herritarren uzta berria.

Kontzertua 23:00etan hasiko da eta sarrerak eskuratu ditzakezue hemen edota kulturgunean bertan.

Erantzuna gehitu