Dinamoa, Soreasuko sormen gunearen behin betiko proiektua aurkeztu du Azpeitiko Kultur Mahaiak
2015eko udazkenean Azpeitiko Udalak Soreasuko eraikinean sormen gune bat martxan jartzeko asmoa azaldu zuen, Azpeitiko kultur mugimendua indartsu eta antolatuta dagoela ikusita. Sormen gunearen proiektua osatzeko foroa Kultur Mahaiak izan behar zuela iritzi zion; Kultur Mahaiak publiko orokorrarentzako espazio falta identifikatu eta hau lantzeko beharra azaldu zuen jadanik 2013ko bazkideen urteko ohiko batzarrean, eta gogotsu heldu zion Udalaren proposamenari.
Parte hartze prozesuari ekin zion orduan Kultur Mahaiak, Udalarekin elkarlanean, herriko kultur taldeen, bestelako eragileen eta norbanakoen nahiak eta beharrak ezagutu asmoz. Urte eta erdi inguru iraun du honek, eta bertan zehaztu dira sormen gunearen helburu eta oinarriak. Kultur Mahaiko taldeen eta norbanakoen onespen zabalarekin onartu eta aurkeztu dute behin betiko proiektua.
Parte hartze prozesua aurrera zihoan bitartean, sormen guneko espazio bat martxan jartzea erabaki zen, besteak beste, komunitatea osatzen joateko. 2016ko azaroan ireki zen Dinamoa, eta ekitaldiak, tailerrak, aurkezpenak… egin dira bertan. Horrez gain, lanerako tokia ere hartu dute herriko zenbait talde eta norbanakok.
Sormen gunearen oinarriak
Soreasu eraikineko 0 solairuan (egungo Dinamoan) eta lehenengoan kokatuko da sormen gunea eta eremuka antolatuko da: arte eszenikoak, hitza, irudia eta soinua. Lanerako tokiak izango dira, guztienak eta irekiak, eta talde zein norbanakoek izango dute bertan tokia. Sormena sustatu eta babestea da asmoa, horretarako, sortzaileen komunitatea indartuz, formazioa eta lanerako tokia eskainiz, diziplinen arteko nahasketa eta elkarlana sustatuz eta transmisioa bultzatuz.
Eremu bakoitzak antolaketa propioa izatea da asmoa, bertako kideen esku egongo dena. Horrez gain, sormen guneak dinamizatzaile bat izango du, proiektuaren jarraipena eta koordinazioa egiteko. Azkenik, Udalak, Kultur Mahaiak eta dinamizatzaileak osatutako zuzendaritza batzorde bat egongo da, irizpide orokorrak zainduko dituena.
Sormen gunean tokia izan nahi duen orok, izan talde zein norbanako, bere proiektua aurkeztu beharko du: zer egin nahi duen, zer espazio eta material behar duen, zenbat denboraz erabiliko duen… Proiektua aurkezteko ez da epe edo deialdirik egongo, hau da, eskaerak nahi direnean egin ahalko dira.
Proiektu teknikoa abian
Sormen gunearen nondik norakoak bilduko dituen proiektua osatzearekin batera, honen exekuzio proiektua osatzen ere hasiak dira Udala eta Kultur Mahaia, horretan diharduen enpresa batekin. Proiektu honek jasoko du eraikinaren nondik norakoa (banaketak, sarrera-irteerak, materiala… Hau urte amaierarako egin eta 2018ko aurrekontuekin sormen guneko obrei ekitea da Udalaren asmoa.