DOI | Leiho bat sormenari
Gure jardunetik eta gure lan egiteko modutik gertu sentitzen ditugun artistak hautatu eta euren lana erakusteko babesa eskaini asmoz jaio da ekimen hau, azken urteotan Azpeitian, eta batez ere Dinamoaren ingurumarian hazten joan den jendeak bere lana modu egokian erakusteko aukera izan dezan. Sormen jardunaren zirkulua itxi eta komunitatea elikatzen jarraitzea da kontua.
Eta komunitatea diogunean uhin kontzentrikoetan hedatzen den jende taldea dugu gogoan, eta bada gure gogoa sormenari ikusgarritasun gehiago ematea, herritarrek eta nahi duen orok beste gauza batzuk ikusteko aukera izatea, sormen lanarekin beste era bateko harremana ahalbidetzea, eta bide batez Dinamoa sormen guneko jarduna ezagutzera ematea.
Ekimenari Jonathan Espacaren erakusketarekin emango zitzaion hasiera, Final Fantasy Love lanaren aurkezpenarekin. Jarraian etorri dira Pello Ulaziaren Kartoia, papera, guraizeak lana, eta Jokin Guridiren EOME erakusketa bisuala.
Orain, Irati Antia Zuaznabar artistak hartuko dio lekukoa. Dinamoa sormen gunean gauzatutako egonaldian Julian de Zulueta esklabistaren inguruan landutako Azukre Beltza webgune eta ikus-entzunezko instalazioa jarriko ditu ikusgai.
Erakusketaren irekiera ekainaren 7an, arratsaldeko 18.00etan izango da. Eta ondoren, ekainaren 23ra arte egongo da ikusgai Azpeitiko Foru Ibilbideko Udal Erakustokian bertan, honako ordutagiarekin: astelehenetik ostiralera 18.00etatik 20.00etara eta asteburuetan 12.00etatik 14.00etara.
dinamoa.eus atarian duzue DOI programaren inguruko informazio osoagoa. Eta jarraian, erakusketa programan parte hartu duten artisten lanaren inguruko inforazioa dago eskuragarri:
DOI 01 | Jonathan Escapa Etxaniz
. Artistaren eta bere lanaren inguruko informazioa
. Erakusketaren argazki galeria
DOI 02 | Pello Ulazia Ibarzabal
. Artistaren eta bere lanaren inguruko informazioa
. Erakusketaren argazki galeria
DOI 03 | Jokin Guridi Urrutia
. Artistaren eta bere lanaren inguruko informazioa
. Erakusketaren argazki galeria
DOI 04 | Irati Antia Zuaznabar