TAILERRAK

TAILERRAK
Grafiaz Betea (irudia), Esateko Idatzi (hitza), Mikrouhinak (soinua) eta Haragi Bizitan (gorputza) zikloetan diziplina ezberdinetako tailerrak aurkituko dituzu ikasturte osoan zehar.

IRUDIA | Grafiaz Betea: Irudia tresna potentea da, izugarri indartsua, eta irudiaren ahalaz gogoeta egitea tokatzen zaigu, baina baita irudiaren azalaz ere: nola egiten da irudi bat, nola eraikitzen, nola irakurtzen… Mundua idazteko erabiltzen diren grafia guztiak aintzat hartu eta mundua idaztea pentsatu dugu taldean, elkarrekin eta elkarrengandik ikasteko.

HITZA | Esateko Idatzi: Hitza egiten da idatzi, entzun, xuxurlatu, oihukatu, sentitu eta baita dastatu ere. Ukitu, ordea, ezin da ukitu. Gela oso bat har dezake hitz batek, baina ikusi ere, nekez ikusiko duzu. Esateko Idatzi tailer zikloan asko dugu esateko. Istorioak kontatzeko, poemak sortzeko, komikiak egiteko, antzezteko, ikus-entzunezkoak sortzeko, irudiak laguntzeko, norbere gogoetak aurkezteko, aldarrikapen kolektiboetarako... 

GORPUTZA | Haragi Bizitan: Gogoak nahi ez duenean ere, gorputzak beti hitz egiten du. Azaletik egiten dute ihes, ahoak isildu nahi dituenak. Gorputza haragi bizitan dagoenean, ezin da ezkutatu. Ziklo honek gorputza adierazpen eta sorkuntza gune gisa jartzen du erdigunean. Inprobisazioa, dantza, antzerkia eta gorputzarekin lotutako beste hainbat diziplina landuko dira Haragi Bizitan tailer zikloan.

SOINUA | Mikrouhinak: Hutsean, 1mm-1m arteko luzeera dute mikrouhinek. Nimiñoak, ikusezinak dira eta dantzan ari dira gure inguruan. Oharkabean pasatu ohi zaizkigun arren, beti daude hor. Mikrouhinen mehetasun eta zoiltasunari jarraiki, txikitasunetik eta gertutasunetik, eskualdeko bidelagunak alboan eta taldean arituko gara. Ahotsa, errima, improbisazioa eta soinuari loturiko sormen esperientzia ezberdinez gozatuko dugu. 

 

2026 - 2027 IKASTURTEKO AGENDA

 GB_Arte ZaharberritzeaIRAILAK 24

Arte zaharberritzea | Grafiaz Betea
Irakasleak: Intza Larrañaga eta Itziar Beltza
Ordua: 18:00 - 20:00
Hizkuntza: euskara
Azalpena: bi orduko saio honetan, irakasleek beren ofizioa zertan datzan erakutsiko digute eta, ondoren, Soreasuko Sebastian Donearen parrokian dagoen Bakardadearen kaperako zaharberritze-lana bertatik bertara ezagutzeko aukera izango da. 
 

 

 

 

 

 EI_Stand upIRAILAK 26

Stand up tailerra | Esateko Idatzi
Irakaslea: Beñat Iturbe
Ordua:10:00 - 14:00 | 16:00-18:00
Hizkuntza: euskara
Azalpena: jendaurrean aurkezteko testu baten aurreneko bertsioa sortzea da asmoa, adibide teorikoak eta praktikoak baliatuta.
 

 

 

 

  

 

 MIKRO_Sinte egunaURRIAK 17

Sinte Eguna | Mikrouhinak
Irakasleak: Amsia  (Javier Ucar), Codoru (David Aranaz), Deloreak (Jon Fernandez), Sarah Rasinesen eta Enrike Hurtado.
Ordua: 10:00 - 14:00 | 16:30 - 19:30
Hizkuntza: euskara eta gaztelera
Azapena: aurreko ikasturtean sintetizadore modular kolektiboaren inguruko hainbat tailer eskaini zituen Amsia musikariak Mikrouhinak zikloan. Horren harira, eta sorkuntza kolektiboa ardatz hartuta, Sinte Eguna antolatu dugu urriaren 17rako.
 

 

 

 

 HB_Munstro eszenikoaAZAROAK 21

Munstro eszenikoa: performance tailerra
Irakaslea: Maite Aizpurua
Ordua: 10:00 - 14:00 
Hizkuntza: euskara
Azalpena: Adarbakarra obraren sormen-prozesuan oinarrituta, Maite Aizpurua aktoreak "Munstro eszenikoa" performance-tailerra bideratuko du. Ahotsa, mugimendua eta soinua ardatz hartuta, lehenik talde ariketak egingo dira eta, ondoren, norberaren intuiziotik abiatutako idazketa nahiz eszenaratzea landuko dira. Sorkuntza kolektiboaz gozatzeko, esperimentatzeko eta desio zein plazerari lekua egiteko espazioa izango da.