Arkupehotsak

Arkupehotsak
Musika talde hasiberriek plaza batean kontzertu bat emateaz gain, sormen egonaldia eta esperientziak partekatzeko bidelaguna ere izango dute.

 

Esperientzia osoagoa eskaintzeko xedez dator Arkupehotsak. Musika talde hasiberriek plaza batean kontzertu bat emateaz gain, sormen egonaldia eta esperientziak partekatzeko bidelaguna ere izango dute. Uztailaren 15a arte dago irekita izen-ematea

 

2017an Azpeitiko Kulturaz kooperatibak abian jarritako proiektua da Arkupehotsak. Jada lau edizio osatu ditu sortzaile berrien plaza izan nahi duen proiektuak. Tarte honetan dozenaka taldek zapaldu dute Sanagustin arkupeko oholtza. Bitartean Kulturaz kooperatibaren proiektua bera ere osatzen joan da; ekitaldietatik haratago sormen eta transmisio proiektu ugari garatzen ditu orain. 

 

Datorren ikasturtean, esaterako, Dinamoa sormen guneko soinuaren eremua irekiko da eta, honi lotuta, Arkupehotsak ekimenari beste gorputz bat eman nahi izan diogu, esperientzia osoago bat eskainiz: musika sortu, formatu, prestatu eta plazaratzeko aukera bat.  Doinu berrien plaza ez ezik, laborategia, ikasteko eta esperimentatzeko espazioa izango da Arkupehotsak

 

Musika talde edo bakarlari gazteei bi asteburutarako sormen egonaldiak eskainiko zaizkie Dinamoko soinuaren eremuan. Bertan, sortzeko eta entseatzeko espazioa ez ezik, formazio teknikoa eta musikari ezagun baten bidelaguntza izango dute. Egonaldiaren amaieran, berriz, kontzertua eskainiko dute Sanagustin kulturgunean

 

Egonaldi bakoitzean musikari bidelagun bat izango dute talde edo bakarlariek. Arkupehotsaken bidelagun gisa parte hartuko dute, besteak beste, Olatz Salvador eta Tomas Lizarazuk. Musika estilo desberdinak jorratzen dituzten sei bidelagunek parte hartuko dute Arkupehotsaken edizio berritu honetan.   

 

16 eta 25 urte bitarteko talde edo musikariei zuzenduta dago ekimena. Orrialde honen amaierako estekan dagoen galdetegia beteta eman daiteke izena.

 

Sortzaile berriei jardunerako tresnak eskaintzea, inguruan ditugun sortzaileak balioan jartzea eta belaunaldi berriei plaza bat ematea dira proiektuaren xedeak.

  

Eskura dituzu proiektuaren dossier-a eta eskuorria.

 

Ezaugarriak:

  • 16 eta 25 urte bitarteko musikari gazteei zuzendutako ekimena da.
  • Irekita dago izen-ematea.
  • Sei musikari edo musika talde izango dira aukeratuak esperientzia oso hau bizitzeko.
  • Talde bakoitzak egonaldia egingo du Dinamoa sormen guneko Soinuaren Eremuan, bi asteburuz lotarako lekua eta otorduekin. 
  • Hiru jardun landuko dituzte:
    • Talde/musikariaren entseguak zuzenekoa prestatzeko.
    • Formazio teknikoa zein artiskoa.
    • Kolaborazioa musikari ezagun/erreferentzial batekin prestaketan eta kontzertuan.
  • Hileko azken igandean emanaldia eskainiko dute Sanagustin kulturguneko arkupeko eszenatokian eta musikari ezagunaren kolaborazioa izango dute.
  • Komunikazio eta promozio berezia egingo zaie musikari edo musika talde hauei.
  • Amaieran, 2023ko maiatzean, ekitaldi berezi bat egingo da musikari eta talde guztien lana balioan jarri eta edizioari itxiera emateko.

 

 Izen-ematea, hemen!

  

Arkupehotsak_berria_web.jpg